لە درێژەی هێرشەکانی سوپای سوریای دیموکراتیدا بۆ کۆنترۆڵکردنەوەی شارۆچکەی مەنبەج ئەو سوپایە کەمتر لە یەک کیلۆمەتری ماوە بگاتە ناو کۆڵانەکانانی ئەو شارە.
لە ڕۆژئاوای مەنبەجیش هێزەکانی سوریای دیموکراتی و ئەنجومەنی لەشکری مەنبج گەیشتوونەتە گوندی ئەلعەریمە کە ١٠ کیلۆمەتر لە شاری مەنبجەوە دورە، بەمەش نزیکەی ١٧ کیلۆمەتر لە شاری ئەلبابەوە دورن.
دەورەدانی شارۆچکەی مەنبەج سەدان چەکداری داعشی لە شارەکەدا گیرداوە و چەکدارەکان بەرگری سەخت دەکەن تا شارۆچکەکە بپارێزن.
هاوکات ناوەندی ڕاگەیاندنی ئۆپەراسیۆنی مەنبەج ڕایگەیاندووە لە شەڕەکانی دوای مەنبەجدا ٧٠ چەکداری داعش کوژران و ٥ شەڕڤانی سوپای سوریای دیموکراتی شەهید بوون.
لە شەڕەکەی دوێنێی مەنبەجدا سوپای ئەمەریکا و هاوپەیمانی دژ بە داعش هاوکاری تەواوی گەیاندە بەرەکانی شەڕ و ئەمەریکا و فەرەنسا ڕاوێژکاری سەربازیان لەو شەڕەدا هەیە.
هێزەکانی سوریای دیموکراتی هەسەدە و ئەنجومەنی لەشکری مەنبەج ١٣ ڕۆژە ئۆپەراسیۆنی کۆنترۆڵکردنەوەی مەنبەجیان دەستپێکردووە و لەماوەیەدا چەندین گوندیان کۆنترۆڵکردوەتەوە.
ئامانجی گرتنەوەی شاری مەنبەج دەرهێنانی شارێکی ستراتیژییە لە دەستی داعش و گرتنی ڕێگا سەرەکییەکانی ڕۆشتن بۆ ڕەقەیە کە داعش بە پایتەختی خۆی لە سوریا دای دەنێت.